Áskorunn til Íslendinga

 Hér er greininn sem birtist ,v/áskorunnar til mín um að birta hana geri ég það vona að morgunblaðið erfi það ekki við mig .

Þessi grein er skrifuð af Daniel Hannan sem er þingmaður breska íhaldsflokksins á Evrópuþinginu

 

 

"KÆRU Íslendingar! Ég geri mér fulla grein fyrir því að þið standið nú frammi fyrir mjög erfiðum tímum – við stöndum raunar öll frammi fyrir mjög erfiðum tímum – en engir erfiðleikar eru svo miklir að aðild að Evrópusambandinu geti ekki gert þá verri. Ég skil vel að þið séuð í sárum og finnist þið standa ein á báti. Þið hafið fulla ástæðu til þess eftir ömurlega framkomu Gordons Browns í ykkar garð. En ef þið bregðist við með því að leggja niður lýðræðið ykkar og sjálfstæði þá festið þið ykkur í sömu vandamálum og þið eruð í núna um alla framtíð. Innganga í ESB fæli í sér algera örvæntingu, rétt eins og raunin var í tilfelli okkar Breta. Við gerðumst aðilar að forvera sambandsins á hinum erfiðu árum þegar Edward Heath var forsætisráðherra, þegar verðbólga var í tveggja stafa tölu, allt logaði í verkföllum, lokað var reglulega fyrir orku til almennings og þjóðargjaldþrot blasti við. Það er erfitt að ímynda sér að við hefðum stutt aðild áratug áður eða þá áratug síðar. Það hefði einfaldlega ekki ríkt nógu mikil svartsýni og örvænting. Þegar komið var fram á 9. áratug síðustu aldar fór breskur almenningur að gera sér grein fyrir því hvað Evrópusamruninn væri í raun: kötturinn í sekknum. En þá varð einfaldlega ekki aftur snúið. Niðurnjörvaðir af reglugerðafargani frá Brussel glötuðum við samkeppnisforskoti okkar. Við gengum Evrópusamrunanum á hönd við erfiðar aðstæður og afleiðingin var sú að við festum þær aðstæður í sessi. Ekki gera sömu mistökin og við gerðum. Þið þurfið þess ekki! Ég hef haft ómælda ánægju af því að ferðast reglulega til Íslands undanfarin 15 ár og á þeim tíma hef ég orðið vitni að ótrúlegum framförum. Slíkar breytingar eru oft augljósari í augum gesta sem annað slagið koma í heimsókn en þeirra sem hafa fasta búsetu á staðnum. Þegar ég kom fyrst til landsins höfðuð þið nýlega gerst aðilar að Evrópska efnahagssvæðinu sem veitti ykkur fullan aðgang að innri markaði ESB án þess að þurfa að taka á ykkur þann mikla kostnað sem fylgir aðild að sambandinu sjálfu. Ímyndið ykkur að í tímabundnu vonleysi tækjuð þið þá ákvörðun að ganga í ESB og taka upp evruna. Hvað myndi gerast? Í fyrsta lagi yrði gengi gjaldmiðilsins ykkar fest til frambúðar við evruna á því gengi sem þá væri í gildi. Endurskoðun á genginu með tilliti til umbóta í efnahagslífi ykkar væri útilokuð. Að sama skapi yrði ekki lengur hægt að bregðast við efnahagsvandræðum í framtíðinni í gegnum gengið eða stýrivexti. Þess í stað myndu slíkar aðstæður leiða til mikils samdráttar í framleiðslu og fjöldaatvinnuleysis. Það næsta sem þið stæðuð frammi fyrir væri það að fyrir inngönguna í ESB yrði að greiða hátt verð, fiskimiðin ykkar. Þessi mikilvægasta endurnýjanlega náttúruauðlind ykkar yrði hluti af sameiginlegri sjávarútvegsstefnu sambandsins. Fljótlega mynduð þið þó átta ykkur á því að þið hefðuð afsalað ykkur einhverju margfalt dýrmætara en fiskimiðunum. Ykkar mesta auðlegð liggur nefnilega ekki í hafinu í kringum landið ykkar heldur í huga ykkar. Þið búið yfir einhverju best menntaða fólki í heiminum, frumkvöðlastarfsemi er mikil sem og öll framtakssemi. Þið hafið byggt árangur ykkar á minna regluverki, skattalækkunum og frjálsum viðskiptum. En þið mynduð reka ykkur á það að þið hefðuð gengið til liðs við fyrirbæri sem er fyrst og fremst skriffinnskubákn grundvallað á gríðarlegri miðstýringu á öllum sviðum og háum verndartollum í viðskiptum við ríki utan þess. Ég get upplýst ykkur um þá sorglegu staðreynd að afstaðan til ykkar er ömurleg í Brussel. Það er litið niður á ykkur. Daginn sem það lá fyrir að allir bankarnir ykkar höfðu lent í erfiðleikum komu þrír Evrópusinnaðir þingmenn á Evrópuþinginu til mín glottandi hver í sínu lagi: „Jæja Hannan, Íslendingarnir þínir eru ekki beinlínis að gera það gott þessa dagana, ha? Þeir sem hafa viljað standa utan við ESB. Þeir hafa alltof lengi fengið að hafa hlutina eftir eigin höfði, þeir áttu þetta skilið!“ Tilvist ykkar ein og sér sem sjálfstæð og velmegandi þjóð hefur skapað öfund í Brussel. Ef 300 þúsund manna þjóðfélag norður við heimskautsbaug getur náð betri árangri en ESB þá er allur Evrópusamruninn í hættu að áliti ráðamanna sambandsins. Árangur ykkar gæti jafnvel orðið ríkjum sem þegar eru aðilar að ESB hvatning til þess að líta til ykkar sem fyrirmyndar. Það er fátt sem ráðamenn í Brussel vildu frekar en gleypa ykkur með húð og hári. Þið hafið valið. Þið getið orðið útkjálki evrópsks stórríkis, minnsta héraðið innan þess, aðeins 0,002% af heildaríbúafjölda þess. Eða þið getið látið ykkar eigin drauma rætast, fylgt ykkar eigin markmiðum, skráð ykkar eigin sögu. Þið getið verið lifandi dæmi um þann árangur sem frjálst og dugandi fólk getur náð. Þið getið sýnt heiminum hvað það er að vera sjálfstæð þjóð, sjálfstæð í hugsun og athöfnum sem er það sem gerði ykkur kleift að ná þeim árangri sem þið hafið náð á undanförnum áratugum. Hugsið ykkur vandlega um áður en þið gefið það frá ykkur." Meira: mbl.is/esb

Athugasemdir

[Sverrir Einarsson, 11.1.2009 kl. 10:55]

Ættlastu til að mar lesi þetta allt?????????????????? Veistu ekki hvað ég er orðinn gamall hmmm (bara rétt rúmlega 25)

En að öllu gamni sleptu þá ættu evrópusinnar að lesa þetta og ramma inn og hengja upp á vegg hjá sér.

[Helgi Jóhann Hauksson, 11.1.2009 kl. 21:41]

Daniel Hannan er einn af fótgönguliðum hagsmuna Breska Samveldisins og þeirra gríðlegu hagsmuna sem bresk fyrirtæki eiga í því bandalagi nær 60 ríkja fyrrverandi nýlenda Breta og sem nær til alls heimsins. Daniel Hannan gerði það á sínum tíma að tillögu sinni að Bretar gengju úr ESB og aftur í EFTA bara til að geta betur byggt undir viðskiptahagsmuni sína og áhrif í Breska Samveldinu - það voru beinlínis rök hans. Í 15 ár hefur hann setið á Evrópuþinginu bara til að gæta Samveldishagsmuna Breta, berjast gegn ESB og fyrir úrsögn Breta. Fyrir hann hefur Ísland verið ljósið til að vísa á - þar til sannleikurinn hitti hann og okkur. - Það er von að honum sé nú strítt á Evrópuþinginu, merkilegt að það séu ekki nema 3 sem hafa gert það.

Annars er merkilegast við þessa grein að  hér greinir hann frá því að Bretland hafi rambað á barmi þjóðargjaldþrots eftir veru sína í EFTA utan ESB og gegnið i ESB til að bjarga sér frá þjóðargjaldþroti, - og að það tókst einmitt með þeim hætti þ.e. með ESB-aðild. - En svo hafi Bretland ekki orðið samkeppnifært, eins og yfirvofandi þjóðargjaldþrot hafi vitnað um samkeppnisfærni sem hafi horfið með því að bjarga sér frá því .

Sannelikurinn er auðvitað sá að frá lokum nýlenduyfirráða Breta hallaði undan fyrir þeim en draumurinn um endurreisn einhverskonarviðskiptalegs heimsveldis í gegnum Breska Samveldið hefur fyrst og fremst þvælst fyrir Bretum gagnvart framtíðarhagsmunum þeirra sem allan tíman voru við fætur þeirra þ.e. í Evrópu.

Fyrir breskum heimsveldis- og Samveldissinnunum merkir einmitt frasinn um „að horfa fremur til heimsins en til Evrópu“ þetta þ.e. „að efla Breska Samveldið“ þar sem Bretar eru krúnan og æðsta valdið, og það vilja þeir þó það kosti tengsl innan Evrópu.

„Heimssýn“ er því skýrt í höfuð heimsveldisdraums Breta - en við erum hvorki Bretar né eigum gamalt heimsveldi til að leita í og vilja rækta og láta okkur dreyma um.

[Jón Halldór Guðmundsson, 16.1.2009 kl. 14:43]

Ég fylgi ekki breskum íhaldsmönnum að málum.